ಕ್ಷಿಣ ಕನ್ನಡ: ಧರ್ಮಸ್ಥಳದಲ್ಲಿ ಸರಣಿ ಕೊಲೆ ಹಾಗೂ ಅತ್ಯಾಚಾರ ಕೊಲೆಗಳು ನಡೆಯುತ್ತಿವೆ ಎಂದು ಆರೋಪಿಸಿ ಈ ಹಿಂದೆ ಧರ್ಮಸ್ಥಳದಲ್ಲಿ ಸ್ವಚ್ಛತಾ ಕಾರ್ಮಿಕನಾಗಿ ಕೆಲಸ ಮಾಡುತ್ತಿದ್ದ ಚಿನ್ನಯ್ಯ ನೀಡಿರುವ ದೂರಿನ ಆಧಾರದ ಮೇಲೆ ಉತ್ಖನನ ಕಾರ್ಯ ಮುಗಿಸಿದ ಬಳಿಕ ಇದೀಗ ಎಸ್‌ಐಟಿ ಚಿನ್ನಯ್ಯನನ್ನು ಆರೋಪಿಯನ್ನಾಗಿ ಬಂಧಿಸಿ ತನಿಖೆ ಮುಂದುವರಿಸಿದೆ.
ಹೀಗೆ ಚಿನ್ನಯ್ಯನನ್ನು ಆರೋಪಿ ಎಂದು ಬಂಧಿಸಿದ ಕೂಡಲೇ ಕೆಲ ಮಾಧ್ಯಮಗಳು ಚಿನ್ನಯ್ಯನೇ ಆರೋಪಿ, ಇಲ್ಲಿಗೆ ಪ್ರಕರಣ ಅಂತ್ಯವಾಗಿದೆ ಎಂದು ಸುದ್ದಿಗಳನ್ನು ಮಾಡಿದವು ಹಾಗೂ ಮಾಡುತ್ತಾ ಇವೆ. ಆದರೆ ಹೀಗಿರುವಾಗಲೇ ಎಸ್‌ಐಟಿ ಇದು ತನಿಖೆಯ ಆರಂಭವಷ್ಟೇ ಅಂತ್ಯವಲ್ಲ ಎಂಬ ಸಂದೇಶ ರವಾನಿಸಿದೆ.
ಡೆಕ್ಕನ್‌ ಹೆರಾಲ್ಡ್‌ ಈ ಕುರಿತಾಗಿ ಸುದ್ದಿಯೊಂದನ್ನು ಪ್ರಕಟಿಸಿದ್ದು, ಎಸ್‌ಐಟಿ ಮೂಲಗಳ ಪ್ರಕಾರ ತಂಡ ತನಿಖೆಯನ್ನು ಇನ್ನೂ ವಿಸ್ತರಿಸಲು ತೀರ್ಮಾನಿಸಿದೆಯಂತೆ. ಏಳು ವರ್ಷಗಳ ಹಿಂದೆ ಧರ್ಮಸ್ಥಳದಲ್ಲಿ ಕಾಣೆಯಾದ ಮಹಿಳೆಯರ ಕುರಿತು ಸಮಿತಿಯೊಂದು ಸಿದ್ಧಪಡಿಸಿದ್ದ ವರದಿಯೊಂದನ್ನು ಎಸ್‌ಐಟಿ ಪರಿಗಣಿಸಿ ಅದರ ಮೇಲೆ ವಿಚಾರಣೆ ಮುಂದುವರಿಸಲಿದೆ ಎಂದು ಡೆಕ್ಕನ್‌ ಹೆರಾಲ್ಡ್‌ ಪ್ರಕಟಿಸಿದೆ.
2018ರಲ್ಲಿ ವಿ. ಎಸ್‌ ಉಗ್ರಪ್ಪ 5000 ಪುಟಗಳ ವರದಿಯನ್ನು ಸಿದ್ಧಪಡಿಸಿ ರಾಜ್ಯದಲ್ಲಿ ಕಣ್ಮರೆಯಾದ ಮಹಿಳೆಯರ ಮಾಹಿತಿಗಳನ್ನು ಪಟ್ಟಿ ಮಾಡಿತ್ತು. ಈ ವರದಿಯಲ್ಲಿ ಧರ್ಮಸ್ಥಳ ಗ್ರಾಮದಲ್ಲಿ ನಾಪತ್ತೆಯಾದ ಮಹಿಳೆಯರ ವಿವರವೂ ಸಹ ಇತ್ತು. ಹೀಗಾಗಿ ಈ ವರದಿಯನ್ನು ಎಸ್‌ಐಟಿ ಅಧಿಕಾರಿಗಳು ಪರಿಗಣಿಸಲಿದ್ದಾರೆ ಎಂದು ತಿಳಿದುಬಂದಿದೆ.
ಅಲ್ಲದೇ ನೆರೆ ರಾಜ್ಯಗಳಾದ ಕೇರಳ, ತಮಿಳುನಾಡು, ತೆಲಂಗಾಣ, ಆಂಧ್ರ ಪ್ರದೇಶ, ಮಹಾರಾಷ್ಟ್ರ ಹಾಗೂ ಗೋವಾ ರಾಜ್ಯಗಳಿಂದ ಬಂದು ಧರ್ಮಸ್ಥಳದಲ್ಲಿ ನಾಪತ್ತೆಯಾಗಿದ್ದರ ಕುರಿತು ದಾಖಲಾಗಿರುವ ಎಫ್‌ಐಆರ್‌ಗಳ ಬಗ್ಗೆ ಸಹ ಅಧಿಕಾರಿಗಳು ವಿಚಾರಣೆ ನಡೆಸಲಿದ್ದಾರೆ.
ಈ ಮೂಲಕ ಚಿನ್ನಯ್ಯನ ಬಂಧನವೇ ಪ್ರಕರಣದ ಅಂತ್ಯ ಎನ್ನುತ್ತಿದ್ದವರಿಗೆ ಎಸ್‌ಐಟಿ ಶಾಕ್‌ ಕೊಟ್ಟಿದೆ.
Post a Comment